၎င်းအား ခေါ်ယူရန် ဘာစီလိုနာအသင်းကို ဘာနာဒိုဆေးလ်ဗား တောင်းဆိုခဲ့ဖူး

မန်စီးတီးအသင်း၏ ပေါ်တူဂီကွင်းလယ်ကစားသမား ဘာနာဒိုဆေးလ်ဗားသည် ပြီးခဲ့သည့်နှစ်က ၎င်းအား ခေါ်ယူရန် ဘာစီလိုနာအသင်းကို တောင်းဆိုခဲ့ဖူးကြောင်း သိရသည်။ ဘာနာဒိုဆေးလ်ဗားသည် မန်စီးတီးအသင်းတွင် ခြေစွမ်းပြနေသူဖြစ်သလို၊ အောင်မြင်မှုများလည်း ရရှိနေသော်လည်း အပြောင်းအရွှေ့သတင်းများ မကြာခဏ ထွက်ပေါ်လေ့ရှိသူဖြစ်ပြီး ဘာစီလိုနာအသင်းမှာ ၎င်း ငယ်စဉ်ကတည်းက အားပေးခဲ့သည့် အိပ်မက်အသင်းဖြစ်ကြောင်းလည်း သိရသည်။ ထို့ကြောင့် ၂၀၂၁ ခုနှစ် နိုဝင်ဘာနှင့် ဒီဇင်ဘာလအတွင်း ဘာစီလိုနာအသင်းတာဝန်ရှိသူများက ဖယ်ရန်တောရက်စ်၏ အပြောင်းအရွှေ့အတွက် လာရောက်ခဲ့စဉ် ၎င်းကိုလည်း ခေါ်ယူရန် တောင်းဆိုခဲ့ခြင်းဖြစ်ကြောင်း သိရသည်။ ရောက်ရှိလာခဲ့သည့် ဘာစီလိုနာအသင်းတာဝန်ရှိသူများက ၎င်း နောက်ပြောင်နေသည်ဟု ထင်မှတ်ခဲ့သော်လည်း ဘာနာဒိုဆေးလ်ဗားက တာဝန်ရှိသူတစ်ဦးထံ မက်ဆေ့ချ်ပေးပို့၍ပင် တောင်းဆိုခဲ့ခြင်းဖြစ်ကြောင်း Mundo Deportivo သတင်းစာက ဖော်ပြခဲ့သည်။ ဘာနာဒိုဆေးလ်ဗား(၂၇ နှစ်)သည် မန်စီးတီးအသင်းနှင့် ၂၀၂၅ ခုနှစ်အထိ စာချုပ်ချုပ်ဆိုထားသော်လည်း နည်းပြ ဂွါဒီယိုလာက အသင်းတွင် မပျော်ရွှင်သည့်ကစားသမားကို ထိန်းသိမ်းလိုခြင်းမရှိဟု ဆိုထားသောကြောင့် အနာဂတ်မရေမရာဖြစ်နေသည်။ ၎င်းအတွက် ပြောင်းရွှေ့ကြေးကို ပေါင်သန်း(၈၀)ဟု သတ်မှတ်ထားပြီး ဘာစီလိုနာအသင်း ကမ်းလှမ်းခဲ့ပါက ရောင်းထုတ်ရန် စီစဉ်ထားကြောင်း သိရသည်။