လီဝန်ဒေါစကီးကို နောက်ဆုံးအကြိမ် ကမ်းလှမ်းမှုပြုလုပ်ရန် ဘာစီလိုနာအသင်း စီစဉ်နေပြီး အနည်းဆုံးယူရိုသန်း(၆၀)ရမှ ဘိုင်ယန်မြူးနစ် လက်လွှတ်မည်


ဘာစီလိုနာအသင်းသည် ဘိုင်ယန်မြူးနစ်အသင်းမှ ပိုလန်တိုက်စစ်မှူး လီဝန်ဒေါစကီးကို လာမည့်ရက်သတ္တပတ်အတွင်း နောက်ဆုံးအကြိမ်ကမ်းလှမ်းမှုပြုလုပ်ရန် စီစဉ်နေသော်လည်း ဘိုင်ယန်မြူးနစ်အသင်းက အနည်းဆုံး ယူရိုသန်း(၆၀)ရရှိမှသာ လက်လွှတ်မည်ဖြစ်ကြောင်း သိရသည်။ လီဝန်ဒေါစကီးသည် ၎င်းကို အသင်းက စာချုပ်သက်တမ်းတိုးရန် ကမ်းလှမ်းခြင်းမရှိသောကြောင့် အသင်းပြောင်းရွှေ့ရန် ဆုံးဖြတ်ခဲ့ရာ ဘာစီလိုနာအသင်းက ခေါ်ယူရန် ကြိုးပမ်းခဲ့သည်။ ၎င်းကို ခေါ်ယူရန် စိတ်ဝင်စားသည့် အခြားအသင်းအချို့ ရှိသော်လည်း လီဝန်ဒေါစကီးက ဘာစီလိုနာအသင်းသို့ ပြောင်းရွှေ့ရန်သာ စိတ်ဝင်စားခဲ့ပြီး အေးဂျင့် ဇဟာဗီက နှစ်ဖက်အသင်းများနှင့် ဆွေးနွေးညှိနှိုင်းခဲ့ရာ အပေါင်းလက္ခဏာဆောင်ခဲ့ကြောင်း သိရသည်။ သို့သော် ပြီးခဲ့သည့်ရက်ပိုင်းအတွင်း ဘာစီလိုုနာအသင်းက ယူရိုသန်း(၄၀)ဖြင့် စတင်ကမ်းလှမ်းခဲ့ရာ ဘိုင်ယန်မြူးနစ်အသင်းက ပယ်ချခဲ့ပြီးနောက် ရောင်းထုတ်တော့မည်မဟုတ်ဟုလည်း ဆိုခဲ့သည်။ ဘိုင်ယန်မြူးနစ်အသင်းသည် စာချုပ်သက်တမ်းတစ်နှစ်သာ ကျန်ရှိတော့သည့် လီဝန်ဒေါစကီးကို လာမည့်နှစ် နွေရာသီ၌ အလွတ်ထွက်ခွာခွင့်ပြုရမည်ဖြစ်သော်လည်း နည်းပါးသည့် တန်ဖိုးဖြင့် ရောင်းထုတ်လိုခြင်းမရှိကြောင်း သိရသည်။ ထို့ကြောင့် အခြေအနေတိုးတက်ခြင်းမရှိဘဲ ဖြစ်နေခဲ့သော်လည်း ယခုအခါ ဘာစီလိုနာအသင်းက နောက်ဆုံးကြိုးပမ်းမှုအဖြစ် ထပ်မံကမ်းလှမ်းရန် စီစဉ်နေပြီဖြစ်သလို၊ ဘိုင်ယန်မြူးနစ်အသင်းကလည်း ယူရိုသန်း(၆၀)ရရှိပါက ရောင်းထုတ်သွားရန် စီစဉ်နေပြီဟု မီဒီယာများက ဖော်ပြခဲ့သည်။ ထို့ကြောင့် ဘာစီလိုနာအသင်း၏ ကမ်းလှမ်းမှုအပေါ်မူတည်နေပြီး အပြောင်းအရွှေ့ဖြစ်မြောက်ဖွယ်ရှိသည်ဟု သုံးသပ်နေကြသည်။