ဂျူဗင်တပ်စ်အသင်းတိုက်စစ်မှူး စီရော်နယ်လ်ဒိုသည် ပြီးခဲ့သည့် ၂၀၁၈-၁၉ ရာသီမှ စတင်ရေတွက်ပါက စီးရီးအေပြိုင်ပွဲတွင် သွင်းဂိုးပါဝင်ပတ်သက်မှုအများဆုံးကစားသမားအဖြစ် ရပ်တည်နေကြောင်း သိရသည်။ ပြီးခဲ့သည့် ရိုးမားအသင်းနှင့် စီးရီးအေပွဲတွင် စီရော်နယ်လ်ဒိုသည် သွင်းဂိုးတစ်ဂိုးသွင်းယူနိုင်ပြီးနောက် ဂျူဗင်တပ်စ်အသင်းကစားသမားဘဝ သွင်းဂိုး (၆၈)ဂိုးပြည့်ခဲ့သည်။ ထို့ပြင် စီရော်နယ်လ်ဒိုသည် ဂျူဗင်တပ်စ်အသင်းကစားသမားဘဝတွင် ဂိုးဖန်တီးမှု (၁၆)ကြိမ် ပြုလုပ်ထားနိုင်သဖြင့် သူ၏ သွင်းဂိုးနှင့် ဂိုးဖန်တီးမှု နှစ်ခုပေါင်းသည် (၈၄)ကြိမ်အထိ ရှိနေပြီး ၂၀၁၈-၁၉ ရာသီမှ စတင်ရေတွက်ပါက စီးရီးအေပြိုင်ပွဲတွင် သွင်းဂိုးပါဝင်ပတ်သက်မှု အများဆုံးကစားသမားအဖြစ် ရပ်တည်နေခြင်းဖြစ်သည်။ စီရော်နယ်လ်ဒိုသည် ရိုးမားအသင်းနှင့်ပွဲတွင် ဒုတိယဂိုးသွင်းယူနိုင်ရန်အထိနီးစပ်ခဲ့သော်လည်း သူ၏ ညာခြေဖြင့်ကန်သွင်းချက်သည် ဂိုးစည်းပေါ်ထောက်၍ ပြန်ထွက်လာသဖြင့် ကံဆိုးခဲ့ရသည်။ စီရော်နယ်လ်ဒိုသည် စည်းကြပ်ဒိုင်ကို ဂိုးပေးရန်တောင်းဆိုခဲ့သလို၊ ကွင်းလယ်ဒိုင် အော်ဆာတိုကိုလည်း ဂိုးအဖြစ် သတ်မှတ်ပေးရန် တောင်းဆိုခဲ့သည်။ ကွင်းလယ်ဒိုင် အော်ဆာတိုက ဂိုးစည်းမကျော်ကြောင်း သူ၏ လက်ပတ်နာရီအချက်ပြစနစ်မှတစ်ဆင့် ရှင်းပြခဲ့သော်လည်း စီရော်နယ်လ်ဒိုက လက်မခံဘဲ လက်ပတ်နာရီကို အတင်းဆွဲယူကြည့်ခဲ့ကြောင်း သိရသည်။
